Dhool Si Yaadein (Hindi Poem)

Dhool si yaadein bikhar jaayengi 
Pal bhar me baatein badal jaayengi 
Kuchh na bachega paas tere 
Phir kya karega dil tu mere 
Mujhko itna bata de 
Mujhko itna bata de 

Dukh ki ye aandhi mit jaayegi 
Andheri raatein dhal jaayengi 
Gum ke baadal ye chhant jaayenge 
Masti ke lamhe wo phir aayenge 

Kuchh bhi ho, phir na tu rona 
Muskaan apni kabhi na ye khona 
Jeevan hai tera, koi daud nahi hai 
Man ki awaazein shor nahi hain

Kya khoya hai, kya paaya hai 
Isi me saara jeevan bitaya hai 
Aaj yun hi man me ek khyaal aaya hai 
Khwabon ke peechhe bhaag bhaag kar aakhir me kya paaya hai 
Mujhko itna bata de 
Mujhko itna bata de 

Kabhi kabhi kuchh aise hi khyaal man me aate hain 
Kabhi kuchh ashk to kabhi ek muskan de jaate hain 
Na jaane is jag me kaise ye sannaate hain 
Yahaan to goonjti sirf dhool si yaadein hain 

Jhoothe yahaan dikhaawe hain 
Aur jhoothe hi pachhtaawe hain 
Ye shaan-o-shaukat bhi hai jhoothi 
Is jhooth ke peechhe saari duniya roothi 

Kabhi kabhi alag hi kuchh karne ko man hota hai 
Din ke ujiyaale me bhi ye jag sota hai 
Main bhi soya hua tha, ab jaag gaya hoon 
Kyon apne aap se bhaag raha tu 
Mujhko itna bata de 
Mujhko itna bata de 

Ab to man ki sun le pukaar 
Dil se tu ye bojhaa utaar 
Kabhi wo bhi hoga paas 
Jiski hamesha se thi aas 

Intezaar tera bhi hoga kabhi khatm 
Kabhi na kabhi bhar hi jaayenge ye gehre zakhm 
Ye pal gaye to phir na lautenge 
Inhe to phir hum bas yaadon me hi sochenge 

Aur ye dhool si yaadein to bikhar jaayengi 
Pal bhar me baatein sab badal jaayengi 
Kuchh bhi na bachega paas tere 
Phir kya karega dil tu mere 
Mujhko itna bata de 
Mujhko itna bata de

Rate This Post -

{[['', '', ''], ['', '', ''], ['', '', ''], ['', '', ''], ['', '', '']]}